Байни Тоҷикистон ва Қирғизистон Ёддошти тафоҳум оид ба ҳамкорӣ дар соҳаи ҳуқуқи инсон ба имзо расид

ДУШАНБЕ, 22.06.2026 /АМИТ «Ховар»/. Байни Ваколатдор оид ба ҳуқуқи инсон дар Ҷумҳурии Тоҷикистон ва Ақиқатчӣ (Омбудсмени)-и Ҷумҳурии Қирғизистон Ёддошти тафоҳум оид ба ҳамкорӣ ба имзо расонида шуд.

Тавре ба АМИТ «Ховар» аз Ваколатдор оид ба ҳуқуқи инсон дар Ҷумҳурии Тоҷикистон хабар доданд, Ёдошти тафоҳум имрӯз дар дораи Вохӯрии машваратии ниҳодҳои миллии давлатҳои аъзои Созмони ҳамкории Шанхай оид ба ҳифзи ҳуқуқи инсон, ки таҳти раёсати Ҷумҳурии Қирғизистон дар шаҳри Бишкек баргузор гардид, ба имзо расид.

Ҷонибҳо дар вохӯрӣ доир ба ҳамкорӣ дар самти ҳифз ва пешбурди ҳуқуқу озодиҳои инсон, мубодилаи таҷрибаи пешқадам, таҳкими фаъолияти ниҳодҳои миллии ҳуқуқи инсон ва густариши робитаҳои дуҷониба мубодилаи афкор намуданд.

Рушди ҳамкорӣ байни ниҳодҳои миллии ҳуқуқи инсони ду давлат барои таҳкими ҳифзи ҳуқуқҳои инсон, такмили механизмҳои баррасии муроҷиатҳои шаҳрвандон ва пешбурди арзишҳои умумибашарии ҳуқуқи инсон аҳамияти муҳим дорад.

Ваколатдор оид ба ҳуқуқи инсон дар Ҷумҳурии Тоҷикистон Умед Бобозода вобаста ба Эъломияи Хуҷанд дар бораи дӯстии абадии Тоҷикистон, Узбекистон ва Қирғизистон, ки 31 марти соли 2025 дар шаҳри Хуҷанд аз ҷониби сарони давлатҳо ба имзо расид, ёдовар шуд.

Таъкид гардид, ки Ёдошти тафуҳум заминаи ҳуқуқиро барои густариши ҳамкорӣ дар самтҳои мубодилаи иттилоот ва таҷриба, баргузории чорабиниҳои муштарак, таҳқиқоти соҳавӣ, такмили иқтидори касбӣ ва ҳамоҳангсозии фаъолият дар масъалаҳои марбут ба ҳифзи ҳуқуқи инсон фароҳам меорад.

АКС: Ваколатдор оид ба ҳуқуқи инсон дар Ҷумҳурии Тоҷикистон