Байни Ҳукумати Тоҷикистон ва ширкатҳои «Канзи Диёр», «ТВЕА Душанбе саноати кӯҳӣ» созишномаҳои сармоягузорӣ ба имзо расид

ДУШАНБЕ, 06.06.2026 /АМИТ «Ховар»/. Дар шаҳри Душанбе байни Ҳукумати Ҷумҳурии Тоҷикистон ва ҷамъиятҳои дорои масъулияти маҳдуди «Канзи Диёр», «ТВЕА Душанбе саноати кӯҳӣ» созишномаҳои сармоягузорӣ ба имзо расонида шуд, иттилоъ медиҳад АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон.

Созишномаҳои сармоягузорӣ бо Ҷамъияти дорои масъулияти маҳдуди «Канзи Диёр» таъсис, рушди корхонаҳои истихроҷ, коркарди маъданҳо дар шаҳри Панҷакент ва бо Ҷамъияти дорои масъулияти маҳдуди «ТВЕА Душанбе саноати кӯҳӣ» татбиқи лоиҳаи сохтмони марҳилаи дуюми корхонаи истихроҷ, инчунин коркарди тилло дар ҳудуди ноҳияи Айнии вилояти Суғдро пешбинӣ менамояд.

Амалисозии лоиҳаҳо барои татбиқи амалии «Стратегияи рушди саноат дар Ҷумҳурии Тоҷикистон барои давраи то соли 2030», «Стратегияи ҷалби сармоя ба Ҷумҳурии Тоҷикистон барои давраи то соли 2040» ва ҳадафи чоруми стратегии миллӣ — саноатикунонии босуръати мамлакат, инчунин ҷалби сармояи дохилию хориҷӣ, рушди инфрасохтори истеҳсолию иҷтимоӣ, баланд бардоштани сатҳи даромад ва некуаҳволии аҳолӣ, воридоти технологияҳои муосир, афзоиши ҳаҷми содироти маҳсулоти ватанӣ ва таъсиси ҷойҳои нави корӣ мусоидат хоҳад намуд.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон