Дар Агентии назорати давлатии молиявӣ ва мубориза бо коррупсия Рӯзи Ваҳдати миллиро ботантана ҷашн гирифтанд

ДУШАНБЕ, 27.06.2026 /АМИТ «Ховар»/. Дар Агентии назорати давлатии молиявӣ ва мубориза бо коррупсияи Ҷумҳурии Тоҷикистон бахшида ба Рӯзи Ваҳдати миллӣ ҷамъомади тантанавӣ доир шуд. Дар ин хусус ба АМИТ «Ховар» аз ин агентӣ хабар доданд.

Дар ҷамъомад директори Агентии назорати давлатии молиявӣ ва мубориза бо коррупсияи Тоҷикистон Сулаймон Султонзода оид ба  қатъномаи Маҷмаи Умумии Созмони Милали Муттаҳид таҳти унвони «Даҳсолаи байналмилалии таҳкими сулҳ ба хотири наслҳои оянда» иброз намуд, ки қабули ин санад  боз як далели эътирофи байналмилалии ташаббусҳои сулҳпарваронаи Тоҷикистон ва Сарвари давлат муҳтарам Эмомалӣ Раҳмон мебошад.

Таҷрибаи сулҳофаринӣ ва ваҳдатофарии Тоҷикистон, ки заминаи барқарории сулҳу ризоияти миллӣ ва таҳкими давлатдории навинро фароҳам овард, имрӯз ҳамчун намунаи арзишманд дар сатҳи байналмилалӣ эътироф шудааст.

Иштирокчиён баён доштанд, ки қабули ин қатънома ба шароите рост меояд, ки дар минтақаҳои гуногуни сайёра миллионҳо нафар мардуми осоишта ба хавфу таҳдидҳои гуногуни амниятӣ ва ҷангҳои хонумонсӯз дучор мебошанд. Аз ин рӯ, ин падида боиси ифтихори ҳар як шаҳрванди Тоҷикистон буда, бори дигар собит месозад, ки сиёсати хирадмандона, сулҳҷӯёна ва ваҳдатофари Президенти Ҷумҳурии Тоҷикистон муҳтарам Эмомалӣ Раҳмон на танҳо барои пешрафти давлат, балки барои таҳкими сулҳу субот дар ҷаҳон низ хизмат менамояд.

Дар анҷоми ҷамъомад филми ҳуҷҷатӣ бахшида ба Рӯзи Ваҳдати миллӣ ба намоиш гузошта шуд.

АКС: Агентии назорати давлатии молиявӣ ва мубориза бо коррупсияи Ҷумҳурии Тоҷикистон