Дар Душанбе ҷаласаи Комиссияи муштараки Тоҷикистону Ҳиндустон доир гардид

ДУШАНБЕ, 11.06.2026 /АМИТ «Ховар»/. 10 июн дар шаҳри Душанбе ҷаласаи 12-уми Комиссияи муштараки байниҳукуматии Тоҷикистону Ҳиндустон оид ба ҳамкории тиҷоратӣ, иқтисодӣ, илмӣ ва техникӣ дар шакли маҷозӣ баргузор гардид, иттилоъ медиҳад АМИТ «Ховар» бо истинод ба Вазорати рушди иқтисод ва савдои Ҷумҳурии Тоҷикистон.

Дар ҷаласа масъалаҳои густариши ҳамкорӣ дар соҳаҳои тиҷорат ва сармоягузорӣ, кишоварзӣ ва амнияти озуқаворӣ, тандурустӣ ва дорусозӣ, энергетика, саноат, технологияҳои рақамӣ ва инноватсия, сайёҳӣ, меҳнат ва ҳифзи иҷтимоӣ, нақлиёт, инчунин бонкдорӣ ва суғурта мавриди баррасӣ қарор дода шуд.

Ҳамчунин ҷонибҳо оид ба рушди ҳамкории саноатӣ, татбиқи лоиҳаҳои муштарак дар самти энергияи барқароршаванда, рақамикунонии иқтисод ва таҳкими робитаҳои соҳибкорӣ мубодилаи афкор намуданд.

Комиссияи муштараки байниҳукуматӣ ҳамчун механизми муҳими тавсеаи ҳамкории тиҷоратию иқтисодӣ ва пешбурди робитаҳои амалии ду мамлакат мебошад.

АКС: Вазорати рушди иқтисод ва савдои Ҷумҳурии Тоҷикистон