Рӯзи фарҳанги шаҳри Исфара дар Душанбе доир шуд

ДУШАНБЕ, 20.06.2026 /АМИТ «Ховар»/. Имрӯз дар Боғи «Ирам»-и шаҳри Душанбе Рӯзи фарҳанги шаҳри Исфара бо шукӯҳу шаҳомати хос  баргузор  шуд. Дар ин рӯз оид   ба  дастоварҳои шаҳр дар 35 соли соҳибистиқлолӣ ба сокинону меҳмонони пойтахт маълумоти муфассал пешниҳод гардид, иттилоъ медиҳад АМИТ «Ховар».

Дар ин рӯз намоиш-фурӯши молу маҳсулоти кишоварзӣ, ҳунарҳои мардумӣ, намоиши дастовардҳои соҳаҳои маориф, тандурустӣ, варзиш,  корхонаҳои саноатӣ,  кишоварзӣ, инчунин намунаҳои ҳунарҳои мардумӣ ва маҳсулоти истеҳсолии маҳаллӣ ба намоиш гузошта шуданд.

Нахуст меҳмонон ва иштирокдорон аз гӯшаҳои намоишгоҳ боздид намуда, бо дастовардҳои иқтисодиву фарҳангии шаҳри Исфара аз наздик шинос шуданд.

Таъкид гардид, ки Рӯзҳои фарҳанги шаҳру ноҳияҳо дар шаҳри Душанбе барои муаррифии дастовардҳо, имкониятҳои иқтисодӣ ва фарҳанги миллӣ заминаи мусоид фароҳам меорад.

Дар идомаи чорабинӣ барномаи бошукӯҳи фарҳангӣ бо иштироки ҳунармандон ва санъаткорон манзури меҳмонон гардида, бо суруду таронаҳои дилнишин, рақсу оҳангҳои миллӣ ва саҳнаҳои ҷолиби ҳунарӣ ба чорабинӣ ҳусни тоза бахшид.

Ёдовар мешавем, ки шуруъ аз 6 июни соли равон бахшида ба 35-солагии Истиқлоли давлатӣ ҳар ҳафта,  рӯзҳои шанбе ва якшанбе дар боғҳои шаҳри Душанбе рӯзҳои фарҳанги шаҳру ноҳияҳои мамлакат баргузор мегардад.

АКС: Тоҳирҷон САИДЗОДА/АМИТ «Ховар»