Дар Институти иқтисодиёт ва демография қабули Даҳсолаи байналмилалии таҳкими сулҳро иқдоми беназир дар ҷаҳон арзёбӣ намуданд

ДУШАНБЕ, 26.06.2026 /АМИТ «Ховар»/. Дар Институти иқтисодиёт ва демографияи Академияи миллии илмҳои Тоҷикистон бахшида ба қабули қатъномаи Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036», ки аз ҷониби Президенти Тоҷикистон муҳтарам Эмомалӣ Раҳмон пешниҳод гардид, ҳамоиш баргузор шуд. Дар ин хусус АМИТ «Ховар» бо истинод ба Институти иқтисодиёт ва демография иттилоъ медиҳад.

Дар ҳамоиш муовини директор Дилшод Ҷалилзода иброз дошт, ки қабули ин қатънома дар вазъияти тезу тунде, ки имрӯз ҷаҳон қарор дорад, дар минтақаҳои гуногуни сайёра миллионҳо нафар мардуми осоишта ба хавфу таҳдидҳои гуногуни амниятӣ ва ҷангҳои хонумонсӯз дучор мебошанд, амри саривақтӣ ва зарурӣ мебошад.

«Санади мазкур аз ҳамаи давлатҳо даъват менамояд, ки дар роҳи расидан ба сулҳи пойдор ва арҷгузорӣ ба он дар ҳамаи сатҳҳо – аз оила, ҷомеа, кишвар ва минтақа то муносибатҳои байналмилалӣ талош варзанд. Мо бояд ба қадру манзалати сулҳу субот ва ваҳдати миллӣ расем, барои ҳифзи ин неъмати бебаҳо, ки амалӣ гардидани нияту орзуҳои неки ҳар як фарди ҷомеа аз он вобаста мебошад, боз ҳам бештар талош намоем»,-афзуд ӯ.

Дар ҳамоиш ходими пешбари илмии инситут Файзулло Холбобоев гуфт, ки «дар ҳақиқат, ваҳдати миллӣ барои мо танҳо як ҷашн нест. Ин кафолати ҳаёти орому осуда, рушди иқтисод ва ояндаи дурахшони фарзандони мост. Халқи тоҷик бо хиради худ тавонист аз имтиҳони сахти таърих гузарад ва иттиҳоди худро нигоҳ дорад».

«Тавре Пешвои миллат таъкид намуданд, мо – мардуми Тоҷикистон арзиши бебаҳои неъмати сулҳу субот ва ваҳдату ҳамдигарфаҳмиро замоне дарк кардем, ки мухолифатҳои шадиди сиёсӣ ва ҷанги таҳмилии шаҳрвандиро аз сар гузаронидем. Бинобар ин, мардуми мо даҳшату фоҷеаҳои ҷанги таҳмилии шаҳрвандии ибтидои солҳои 90-уми асри гузаштаро ҳаргиз фаромӯш намекунанд»,-тазаккур дод номбурда.

Иштирокдорони дигари ҳамоиш иброз доштанд, ки «мо вазифадорем, ин сулҳу суботи гаронбаҳоро чун гавҳари чашм ҳифз кунем ва барои пешрафти Тоҷикистони азиз якҷоя талош намоем. Муваффақияти мардуми мо маҳз дар ваҳдат, ҳамдилӣ ва кӯшишҳои якҷояи мову шумост. Бигзор сулҳу ваҳдат ва хонаободӣ ҳамеша пойдор бошад!».

АКС: Институти иқтисодиёт ва демографияи Академияи миллии илмҳои Тоҷикистон