Дар Вазорати маориф ва илм бахшида ба Рӯзи Ваҳдати миллӣ ҳамоиши илмӣ-назариявӣ доир гардид

ДУШАНБЕ, 13.06.2026 /АМИТ «Ховар»/. Ваҳдати миллӣ барои миллати сарбаланду фарзона ва мутамаддини тоҷик ба як мактаби эътимодбахшу тақдирсоз табдил ёфтааст.  Маҳз дар заминаи сулҳу субот ва Ваҳдати миллӣ соҳаҳои гуногуни мамлакат, аз ҷумла илму маориф, рушд ёфта, барои ташаккули неруи зеҳнӣ ва рушди захираҳои инсонӣ шароити мусоид фароҳам оварда шудааст. Ин нуктаро 12 июн Вазири маориф ва илми Ҷумҳурии Тоҷикистон Раҳим Саидзода зимни баргузории  ҳамоиши илмӣ-назариявӣ таҳти унвони «Ваҳдати миллӣ ва рушди илму маориф дар Тоҷикистон» баргузор гардид,  иброз намуд.

Ба гуфтаи Раҳим Саидзода, маҳз дар шароити сулҳу субот ва Ваҳдати миллӣ, ки бо талошҳои пайвастаи Президенти Ҷумҳурии Тоҷикистон муҳтарам Эмомалӣ Раҳмон таъмин гардидааст, барои рушди соҳаи маориф ва илм, баланд бардоштани сатҳи маърифат ва тарбияи насли наврас дар рӯҳияи ватандӯстӣ ва худшиносии миллӣ заминаи мусоид фароҳам омадааст.

Дар ҳамоиш иштирокдорон доир ба мавзуи «Ваҳдати миллӣ – андешаи меҳварӣ дар худшиносии миллӣ»,  «Эмомалӣ Раҳмон ва рушди устувори иқтисоди миллӣ» ва дигар самтҳо маъруза  намуда, баён карданд, ки сарнавишти таърихии ҳар як миллат бо рӯйдодҳо ва шахсиятҳои тақдирсоз тавъам аст, ки дар лаҳзаҳои сарнавиштсоз ва печидаи замон нақши таърихӣ мебозанд.

Таъкид гардид, ки Ваҳдати миллӣ на танҳо як ормони идеологӣ, балки пояи асосии давлатдории миллии тоҷикон дар замони муосир мебошад, ки дар таҳкими он нақши Пешвои миллат чун меъмори ваҳдат калидӣ ва тақдирсоз аст.

Дар ҷараёни музокираҳо иштирокдорон доир ба масъалаҳои мубрами рушди илму маориф, таҳкими худшиносии миллӣ, тарбияи насли наврас дар рӯҳияи ватандӯстӣ ва истифодаи самараноки дастовардҳои илмӣ мубодилаи афкор намуданд.

АКС: Вазорати маориф ва илми Ҷумҳурии Тоҷикистон