Иштирокдорони Форуми байналмилалии ҳизбҳои сиёсӣ дараи Алмосӣ ва Қалъаи Ҳисорро тамошо карданд

ДУШАНБЕ, 12.06.2026 /АМИТ «Ховар»/. Ҳайати иштирокдорони Форуми байналмилалии ҳизбҳои сиёсӣ, ки таҳти унвони «Ҳизбҳои сиёсӣ ва уфуқҳои нави ҳамкорӣ» бо иштироки аҳзоби бонуфузи сиёсии давлатҳои дӯсту ҳамкор 11 июн дар шаҳри Душанбе доир гардид, бо роҳбарии муовини якуми Раиси Ҳизби Халқии Демократии Тоҷикистон Маликшо Неъматзода аз шаҳри Ҳисор боздид намуданд. Дар ин хусус АМИТ «Ховар» бо истинод ба Мақомотии иҷроияи ҳокимияяти давлатии шаҳри Ҳисор иттилоъ медиҳад.

Меҳмононро Раиси шаҳри Ҳисор Ҷаббор Носирзода, намояндагони Кумитаи иҷроияи Ҳизби Халқии Демократии Тоҷикистон дар шаҳри Ҳисор ва ҷавонони шаҳр тибқи анънаҳои таомули аҷдодӣ, таҳти садои карнаю сурнай бо нону намак истиқбол намуда, ташрифи онҳоро ба шаҳри бостонӣ хайрамақдам гуфтанд.

Меҳмонон аз дараи Алмосӣ, ки бо қарори Созмони озуқа ва кишоварзии Созмони Милали Муттаҳид (UNFAO) 8 июли соли 2025 ба «Низоми мероси кишоварзии дорои аҳамияти ҷаҳонӣ-GIAHS» ворид гардид, боздид намуда, бо боғи гелсос ва токзори минтақа, инчунин дар Мамнуъгоҳи таърихию фарҳангии Ҳисор меҳмонон бо Регистон, Арки қалъа, Қасри Ҳоким, Аскархона, Амфитеатр ва раставу дӯконҳои ҳунармандии дохили қалъа шинос шуданд.

Дар тарабхонаи «Шаршара» чорабинии пуршукӯҳи шоми фарҳангӣ баргузор шуда, аз ҷониби ҳунармандони шуъбаи фарҳанги шаҳр барномаи ҷолиби консертӣ пешкаши меҳмонон гардонида шуд.

АКС: Мақомоти иҷроияи ҳокимияти давлатии шаҳри Ҳисор