Дар Душанбе китоби «Президент сказал: Любите!…» рӯнамоӣ гардид

ДУШАНБЕ, 31.08.2026 /АМИТ «Ховар»/. Имрӯз дар шаҳри Душанбе китоби рӯзноманигор Саидалӣ Сиддиқ «Президент сказал: Любите!…» рӯнамоӣ гардид, иттилоъ медиҳад АМИТ «Ховар».

Дар маросими рӯнамоӣ гуфта шуд, ки китоби «Президент сказал: Любите!…» ҳамчун беҳтарин армуғони маънавӣ ва манбаи муҳимми таърихию сиёсӣ барои олимон, донишҷӯён ва аҳли ҷомеа хизмат намуда, дар таҳкими худшиносии миллӣ ва давлатдорӣ нақши муҳим мегузорад.

Китоб дар Нашриёти «Ирфон» ба нашр расидааст. Дар он муаллиф маводи таҳлилӣ ва мусоҳибаҳоеро, ки то имрӯз нашр шудаанд, ҷамъоварӣ ва чоп кардааст.

Гуфта шуд, ки мавзуъҳое, ки муаллиф дар ин китоб ҷамъоварӣ намудааст, рӯзмарра ва барои хонандагон муҳим мебошанд.

Дар идома таъкид гардид, ки китоб ба рушди маънавию фарҳангии ҷомеа, боло бурдани сатҳи худшиносии миллӣ ва таҳкими маърифати сиёсии хонандагон равона гардидааст.

Иброз гардид, ки муаллиф бо нашри ин асари тозанашр тамоми заҳматҳо ва ташаббусҳои Президенти Ҷумҳурии Тоҷикистон муҳтарам Эмомалӣ Раҳмонро муаррифӣ намудааст.

Саидалӣ Сиддиқ дар матбуоти тоҷику хориҷӣ, инчунин дар маҷмуаҳои давлатӣ беш аз 900 очерк, мақола, мусоҳиба ва очерку ҳикояҳо ба чоп расонидааст.

АКС: АМИТ «Ховар»