Ҳабибулло Воҳидзода дар ҷаласаи ҳафтуми прокурорҳои генералии кишварҳои аъзои Созмони ҳамкории иқтисодӣ иштирок намуд

ДУШАНБЕ, 11.09.2026 /АМИТ «Ховар»/. 11 сентябр дар шаҳри Туркистони Ҷумҳурии Қазоқистон Прокурори генералии Ҷумҳурии Тоҷикистон Ҳабибулло Воҳидзода дар ҷаласаи ҳафтуми прокурорҳои генералии кишварҳои аъзои Созмони ҳамкории иқтисодӣ иштирок намуд. Дар ин хусус ба АМИТ «Ховар» аз Прокуратураи генералии Ҷумҳурии Тоҷикистон хабар доданд.

Дар ҷаласа, ки таҳти раёсати ҷониби Қазоқистон баргузор гардид, ҳамчунин ҳайатҳои Озарбойҷон, Эрон, Қирғизистон, Покистон, Туркманистон, Туркия, Узбекистон, инчунин Котиботи Созмони ҳамкории иқтисодӣ (СҲИ) ва Шурои ҳамоҳангсозии прокурорҳои генералии кишварҳои аъзои Иттиҳоди Давлатҳои Мустақил иштирок намуданд.

Зимни ҷаласа масъалаҳои рақамикунонӣ дар таъқиби ҷиноӣ, ҷиноятҳои киберӣ, аз ҷумла мубориза бо интернет-қаллобӣ, криптоасъорҳо ва иқтисоди пинҳон баррасӣ шуданд. Ҳамзамон масъалаҳои мубориза бо шабакаҳои муташаккили ҷиноятӣ, муҳоҷирати ғайриқонунӣ, хариду фурӯши одамон, қочоқи маводи мухаддир ва дигар ҷиноятҳои фаромиллӣ, инчунин ҳифзи манфиатҳои давлатӣ дар самти ҳифзи муҳити зист мавриди баррасӣ қарор дода шуд.

Аз рӯи натиҷаҳои ҷаласа иштирокдорон барои мустаҳкам намудани ҳамкории амалӣ байни прокуратураҳои генералии кишварҳои аъзои Созмон дар мубориза бо ҷинояткории муташаккили фаромарзӣ изҳори омодагӣ намуданд.

Ҷонибҳо ба мувофиқа расиданд, ки ҳамоҳангии муассирро таъмин сохта, мубодилаи иттилоотро рушд диҳанд ва дар ташкили машғулиятҳои мавзуӣ, вохӯриҳо ва барномаҳои муштараки омӯзишӣ мусоидат намоянд.

Қарор дода шуд, ки ба тақвияти чораҳои минтақавӣ оид ба мубориза бо қочоқи маводи мухаддир, қочоқи дороиҳои фарҳангӣ ва таърихӣ, қочоқи инсон ва ҷиноятҳои киберӣ таваҷҷуҳи махсус зоҳир намоянд.

Ҳамчунин иштирокдорон аҳамияти баланд бардоштани самаранокии ёрии ҳуқуқии мутақобила, фаъолгардонии мубориза бар зидди қонунигардонии (расмикунонии) даромадҳои бо роҳи ҷиноят бадастоварда ва таъмини баргардонидани дороиҳоро таъкид намуда, барои муттаҳидсозии минбаъдаи кӯшишҳо ва амиқтар кардани шарикии ҳамаҷониба вазифагузорӣ намуданд.

Илова бар ин, қарор дода шуд, ки ҳамкорӣ дар соҳаи омӯзиши касбии кормандони мақомоти прокуратура, аз ҷумла баргузории машғулиятҳои муштараки илмӣ-амалии махсусгардонидашуда ва дигар чорабиниҳо оид ба масъалаҳои ҳифзи манфиатҳои давлатӣ дар соҳаи ҳифзи муҳити зист ва мубодилаи таҷриба дар муайян кардан ва пешгирии қонуншиканиҳои экологӣ густариш дода шавад.

АКС: Прокуратураи генералии Ҷумҳурии Тоҷикистон