Прокурорҳои генералии Тоҷикистон ва Эрон тақвияти ҳамкории ҳуқуқиро баррасӣ намуданд

ДУШАНБЕ, 12.09.2026 /АМИТ «Ховар»/. 11 сентябр дар шаҳри Туркистони Ҷумҳурии Қазоқистон дар доираи ҷаласаи прокурорҳои генералии давлатҳои аъзои Созмони ҳамкории иқтисодӣ Прокурори генералии Ҷумҳурии Тоҷикистон Ҳабибулло Воҳидзода бо Прокурори генералии Ҷумҳурии Исломии Эрон Муҳаммад Қозим Моваҳеди Озод вохӯрӣ намуд.

Тавре ба АМИТ «Ховар» аз Прокуратураи генералии Ҷумҳурии Тоҷикистон хабар доданд, дар вохӯрӣ ҷонибҳо робитаҳои амиқи таърихӣ-фарҳангӣ ва мероси муштараки забонии ду давлатро муҳим арзёбӣ намуда, рушди устувори ҳамкории байниидоравиро аз замони барқарор шудани муносибатҳои дипломатӣ таъкид карданд.

Роҳбарони мақомоти назоратӣ масъалаҳои тақвияти ҳамкории касбӣ, инчунин таҳияи механизмҳои мустақими иттилоотониро ҳам дар сатҳи роҳбарият ва ҳам байни воҳидҳои фаврию прокуратураҳои минтақавӣ баррасӣ карданд.

Ба тақвияти ҳамкории муштарак барои муқовимат ба таҳдидҳои муосир ва хатарҳои фаромиллӣ, аз ҷумла пешгирии зуҳуроти экстремистӣ, гардиши ғайриқонунии маводи мухаддир ва фаъолияти гурӯҳҳои ҷиноятии фаромиллӣ таваҷҷуҳи махсус зоҳир гардид.

Инчунин зимни вохӯрӣ оид ба вазъи мураккаби Ховари Миёна ва дастгирии ташаббусҳои сулҳҷӯёна мавқеи принсипиалии Ҷумҳурии Тоҷикистон дар ҳалли истисноии сиёсӣ ва дипломатии низоъҳо бар асоси ҳуқуқи байналмилалӣ ва Оинномаи Созмони Милали Муттаҳид таъкид карда шуд.

Дар охир ҷонибҳо уҳдадории худро барои густариши минбаъдаи ҳамкории дуҷонибаи ҳуқуқӣ дар чаҳорчӯби шартномаҳо ва конвенсияҳои байналмилалӣ барои таъмини волоияти қонун ва амният дар ҳарду давлат тасдиқ карданд.

 АКС: Прокуратураи генералии Ҷумҳурии Тоҷикистон