Ашрафҷон Гулов бо Сафири навтаъйини Амороти Муттаҳидаи Араб дар Ҷумҳурии Тоҷикистон Носир Ҳувайдин Зайбон Алӣ Ал-Катбӣ мулоқот намуд

ДУШАНБЕ, 07.10.2026 /АМИТ «Ховар»/. 7 октябр дар шаҳри Абу Забӣ Сафири Фавқулодда ва Мухтори Ҷумҳурии Тоҷикистон дар Амороти Муттаҳидаи Араб Ашрафҷон Гулов бо Сафири навтаъйини Фавқулодда  ва  Мухтори Амороти Муттаҳидаи Араб дар Ҷумҳурии Тоҷикистон Носир Ҳувайдин Зайбон Алӣ Ал-Катбӣ мулоқот намуд.

Тавре ба АМИТ «Ховар» аз Сафорати Ҷумҳурии Тоҷикистон дар Амороти Муттаҳидаи Араб хабар доданд, дар мулоқот ҷонибҳо вазъи кунунӣ ва дурнамои ҳамкории мутақобилан судманди ду мамлакат дар бахшҳои гуногуни сиёсӣ, иқтисодӣ, тиҷоратӣ, энергетика, нақлиёт, инфрасохтор, саноат, маориф, фарҳанг, сайёҳӣ, тандурустӣ, бонкдорӣ, илму технологияи муосир, кишоварзӣ, обу иқлим ва рушди устуворро мавриди баррасӣ қарор доданд.

Ҷонибҳо  ҳамчунин доир ба аҳаммияти таҳкими ҳамкории Тоҷикистон ва Аморот дар доираи созмонҳои байналмилалӣ ва минтақавӣ, бахусусСозмони Милали Муттаҳид табодули назар карданд.

Дар фарҷоми суҳбат сафирон омодагии хешро ҷиҳати саҳмгузорӣ дар рушди бештари равобити дуҷониба ва бисёрҷониба миёни ҳар ду мамлакат баён намуданд.

АКС: Сафорати Ҷумҳурии Тоҷикистон дар Амороти Муттаҳидаи Араб