Қонуне, ки танзимкунандаи зиндагӣ ва таҳкимбахши тафаккури мардум аст

ДУШАНБЕ, 18.08.2017 /АМИТ «Ховар»/. Муовини директори Китобхонаи миллии Ҷумҳурии Тоҷикистон Салима Раҷабова Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон»-ро танзимкунандаи зиндагӣ ва таҳкимбахши тафаккури мардум дониста, риояи онро аз ҷониби на танҳо мансабдорон, балки ҳар як шаҳрванди Тоҷикистон ҳатмӣ ва зарурӣ медонад.

Мавсуф оид ба шарҳи лоиҳаи тағйиру иловаҳо ба ин қонун гуфт: «Қонун танзимкунандаи зиндагӣ ва таҳкимбахши тафаккури мардум аст. Зеро то ин дам маъракаҳое, ки аз фарҳанг ва тамаддуни бегона ба зиндагии мардум васл гардида буданд, мардумро водор менамуданд, то барои дигарон андеша кунанд, на барои беҳтар намудани зиндагии хеш. Ҳоло он ба мардум сабукӣ овард. Як мусибате, ки болои оилаҳо пайдо мешуд, дар баробари  талху сангин буданашон боз бар замми он ин маросимҳои беҳудае чун се, ҳафт, бист, чил ва ғайра андуҳ ва мушкили мардумро дучанд мекарданд. Мардум ба қавле “мурдаро монда, тутхӯрӣ” мекарданд. Ин қонун бо татбиқи худ миллати тоҷикро аз банди хурофоту бегонапарастӣ раҳо намуда, ба мардум башорати шоиста хоҳад дод.

Тағйиру иловаҳое, ки ба Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» пешниҳод шудаанд, як навъ беҳбудие дар ҳаёти мардум шуморида мешаванд. Яъне, қаблан барои гузаронидани хатнасур омодагии зиёд дида, онро дар доираи васеъ пешвоз мегирифтанд. Мо аз ин маъракаи сода як маъракаи боҳашамат месохтем ва ба мардум чанд намуд хӯрокҳо пешниҳод мекардем, сарояндаҳоеро, ки арзиши хизматрасонияшон бисёр гарон буд, даъват мекардем ва бо ин корҳоямон ба исрофкорӣ роҳ медодем. Акнун онро дар доираи оила ҷашн мегирем»,-изҳор дошт ӯ.