ОМӮЗИШИ УСУЛҲОИ КИШТИ ТИРАМОҲӢ

Душанбе, 24 сентябр. (АМИТ «Ховар», Бекназари Абӯбакр). – 23 сентябр дар ноҳияи Ҷалолиддини Румӣ бо мақсади дар мӯҳлати муайян ва дар шароити мусоиди агротехникӣ, хушсифат ва сари вақт гузаронидани кишти тирамоҳии зироатҳои ғалладона ва гузоштани заминаи устувор барои ҳосили соли 2009, дар мавзӯи «Кишти тирамоҳии ғалладона» семинар баргузор гардид. Дар он олимону мутахассисони соҳаи кишоварзии минтақа, роҳбарони корхонаҳои кишоварзӣ ва хоҷагиҳои деҳқонии вилояти Хатлон иштирок намуданд. Аз маркази матбуот ва иттилооти Вазорати кишоварзӣ ба АМИТ «Ховар» хабар доданд, ки дар семинар мавзӯъҳои «Усулҳои парвариши ғалладонаи тирамоҳӣ», «Тухмии хушсифат — асоси ҳосили фаровони зироатҳои ғалладона» ва «Аз бемориҳо ва ҳашароти зараррасон эмин нигоҳ доштани зироат» муҳокима карда шуданд. Ёддовар мешавем, ки соли ҷорӣ дар ҷумҳурӣ дар масоҳати 292 ҳазору 447 гектар зироатҳои ғалладона ва лӯбиёгӣ кишт карда шуд. Аз ҷумла, дар вилояти Хатлон 127 ҳазору 654 гектар ва дар ноҳияи Ҷалолиддини Румӣ 2457 гектар зироатҳои ғалладона ва лӯбиёгӣ корида шуд.