ВАҚТЕ КИ БА МО ПАЙРАВӢ КУНАНД

Душанбе, 25 сентябр. (АМИТ «Ховар», Лаззат Диловарзод).- Бино ба гуфти Раиси раёсати кооперативи истеҳсолии ба номи Карим Исмоилови ноҳияи Ваҳдат Имомназар Сангалиев, хоҷагӣ соли ҷорӣ дар майдони 1 ҳазору 2 гектар кишти гандум, сабзавот ва пахтаро ба роҳ монд. Хоҷагӣ аз 300 га майдони кишти гандуми навъи «Жагер» 30 сентнерӣ ҳосил ба даст овард, ки ин дар ноҳия нишондиҳандаи хуб аст . Аз 36 га замини сабзавот 176 сентнерӣ ҳосил бардошта шуд, ки ин ҳам қобили қабули мутахассисон аст. Аъзои хоҷагӣ ба ҷамъоварии пахта машғуланд. Ҳоло аз 380 га замини пахтазор дар чиниши аввал аз ҳар гектар 11 сентнерӣ ҳосил ба даст оварда шудааст, ки ин муваффақияти боз ҳам бештар аст. «Сирри ҳамаи ин муваффақият дар меҳнати ҳалол ва дилгармӣ ба кор аст, ки барои коргарон муҳайё сохта шудааст. Агар ҳама ба мо пайравӣ кунанд, ба чунин муваффақият ноил хоҳанд шуд» иброз дошт сардори хоҷагӣ дар сӯҳбат ба мухбири АМИТ «Ховар».