ШАҲРВАНДОН 5 РӮЗ БОЗ ТАШНАИ ОБАНД

           Душанбе, 11 декабр. (АМИТ «Ховар», Лаззат Диловарзод).- Идораи обу корези шаҳри Душанбе додани оби ошомиданиро ҳатто  ба хонаҳои аз ин идора дар масофаи 50-100 метр дуртар фаромӯш кардааст. Тибқи иттилои сокинони хонаҳои 4-ошёнаи кӯчаи Шевченко 44, 45, 46, ду рӯз пеш аз Иди Қурбон додани об ба қабати чоруми ин биноҳо қатъ гардидааст. Бо вуҷуди тамосҳои телефонӣ ба Идораи обу корези шаҳр ва муроҷиати даҳонии шаҳрвандон ба ин идора, сабаби қатъ шудани об норавшан монд. Рӯзҳои 9-10-уми декабр додани об ба ошёнаҳои 3-юми ҳамин биноҳо қатъ ёфтааст. Сокинони биноҳои номбурда аз болои Идораи обу корез ба Ҳукумати шаҳри Душанбе шикоят оварданианд, аммо корафтодаҳо мегӯянд: «Даҳони пӯшида ҳазор тилло!».