БОНКИ МИЛЛӢ ҚУРБИ СОМОНИРО УСТУВОР МЕДОРАД?

             Душанбе, 27 январ. (АМИТ «Ховар», Покиза Маҳмадбекова). — «Дар соли 2008 — ум мо ҳаракат кардем қурби пули миллиро нигоҳ дорем. Таъсири бӯҳрони молиявӣ мушоҳида намешуд ва мо тавонистем аз муомилот 220 миллион доллари амрикоӣ гирем»,- зикр дошт зимни нишасти матбуотӣ раиси Бонки миллии Точикистон Шариф Раҳимзода.              Ӯ афзуд, ки имрӯз мо аз муомилот чунин маблағ гирифта наметавонем. Тавре дида истодаем дар Федератсияи Русия қурби пули миллии онҳо 45 фоиз поён рафт. Гарчаде ки онҳо садҳо миллиард сарф карда бошанд, то қурби пули миллиашонро устувор нигох доранд. Дар ҷумҳуриҳои Қазоқистону Қирғизистон бошад, қурби асъори миллӣ тахминан 10 фоиз ва дар Ҷумҳурии Ӯзбекистон тахминан 21 фоиз поён рафт. Бояд гуфт, ки қурби пули давлатҳои ҳамсоя, ки поён рафт, ин наметавонад ба кишвари мо таъсир нарасонад, зеро ҳамкориҳои мо бо эшон бисёртар ба роҳ монда шудааст.             «Дар ҷумҳурии мо бошад, аз аввали сол қурби сомонӣ 7 фоиз поён рафт. Мо ҳаракат дорем, ки онро устувор нигоҳ дорем ва имрӯз мо аллакай дар Бонки миллӣ микдори зарурии асъори хориҷиро овардем. Мо пайдо намудем чунин ширкатҳоро, ки барои мо ҳар рӯзи ҳафта маблағҳои муайян оранд ва мо ин маблағро ба муомилот мебароварем», — идома дод Ш. Раҳимзода.             Раиси Бонки миллии Тоҷикистон тазаккур дод, ки пастшавии қурби пули миллӣ ба болоравии нарху наво дар бозорҳо таъсири зиёд намерасонад.