ДАР ҚӮРҒОНТЕППА ТӮЙИ АРӮСӢ БАРГУЗОР МЕШАВАД

               Душанбе, 27 феврал.(АМИТ «Ховар», Марзия Саидова).-Дар арафаи Иди байналмилалии бонувон-8 март 28 феврал дар «Кохи Ватан»-и шаҳри Қӯрғонтеппа маросими тӯйи хонадоршавии 30 ҷуфт ҷавонон баргузор мегардад.               Ин маросим бо ибтикори Вазорати меҳнат ва ҳифзи иҷтимоии аҳолии ҷумҳурӣ дар ҳамкорӣ бо намояндагии Кумитаи байналмилалии имдоди имом Хумайнии Эрон гузаронида шуда, ба ҳар кадом навхонадорон ба маблағӣ 3, 5 ҳазор сомонӣ, ки 15 номгӯй ҷиҳози рӯзгорро дар бар мегирад, тақдим карда мешавад. Маросими баргузории тӯйи арӯсӣ, ки дар остонаи Рӯзи байналмилалии модарон- 8 март таҷлил мешавад, таҳти унвони «Шаъни модар» гузаронида шуда, дар бари ҳар ҷуфт арӯсу домод модарони онҳо менишинанд, ки он таҷассумгари бузургию саодати модарон дар ин рӯзи саид аст.                   Раиси намояндагии Кумитаи байналмилалии имдоди имом Хумайнии Эрон дар Ҷумҳурии Тоҷикистон Сайидҷаводи Разавӣ дар сӯҳбат ба хабарнигори АМИТ «Ховар» гуфт, ки маросими баргузории тӯйҳои арӯсӣ дар Тоҷикистон се сол муқаддам зимни мулоқоти Президенти Ҷумҳурии Тоҷикистон Эмомалӣ Раҳмон ва Раиси кулли Кумитаи имдоди имом Хумайнии Эрон дар Теҳрон баррасӣ шуда буд, ки тибқи он дар Тоҷикистон тӯйи арӯсии 1000 ҷуфт ҷавонон гузаронида мешавад. То имрӯз дар Тоҷикистон маросими издивоҷи 760 ҷуфт фарзандони оилаҳои камбизоат гузаронида шуд. Сайидҷаводи Разавӣ мегӯяд, ки дар оянда чунин ҷашнҳои арӯсӣ дар вилоятҳои Суғду Бадахшон гузаронида мешаванд.