РӮЙХАТИ САРВАТМАНДОНИ ҶАҲОН

                         Вашингтон, 12 март (АМИТ «Ховар» — Ассошиэйтед Пресс ). — Маҷаллаи молиявию иқтисодии «Форбес» — и ИМА рӯйхати навбатии ҳарсолаи одамони сарватмандтарини ҷаҳонро чоп кард. Рӯйхати мазкур нисбат ба соли гузашта ба таври ҷиддӣ тағйир ёфт. Вале дар он се ҷои аввалро шахсони сарватмандтарини порсола ишғол менамояд.                          Дар рӯйхат ҷои аввалро бунёдгузори ширкати «Микрософт» Билл Гейтс ишғол менамояд. Маблағи дороии ӯ 40 миллиард доллари ИМА мебошад. Дар ҷои дуюм раиси Шӯрои мудирони ширкати холдинги «Беркшир Хатвай» Уоррен Баффет қарор дорад, ки 37 миллиард доллар ҷамъ овардааст.                          Дар мақоми сеюм сарватманди мексикоӣ Карлос Салим Элу зикр гардидааст, ки маблағи дороии ӯ 35 миллиард доллар аст. Қобили қайд аст, ки ҳар сеи ин сарватмандон дар давоми сол дар натиҷаи бӯҳрони молиявӣ қариб 68 миллиард долларро аз даст доданд.                        Ҷои чоруми рӯйхатро раиси ширкати «Оракл» Лоуренц Элисон ишғол менамояд. Ҷойҳои минбаъдаро ташкилкунандаи шабакаи мағозаҳо дар Шветсия Ингвар Кампрад, роҳбари ширкати «Русал» Олег Дерипаска ва дигарон ишғол менамоянд. Бояд гуфт, ки О.Дерипаска соли гузашта дар рӯйхати сарватмандони ҷаҳон ҷои нуҳумро ишғол мекард, имсол вай дар ҷои 164 — ум қарор дорад. Қайд кардан лозим аст, ки қариб нисфи сарватмандони ҷаҳон (359 нафар) дар ИМА, 196 нафар дар Аврупо ва 130 нафари дигар дар мамлакатҳои Осиё зиндагӣ мекунанд.