Қ. РАСУЛЗОДА БАРОИ СОХТМОНИ ВАРЗИШГОҲ 2,5 МИЛЛИОН СОМОНӢ ҶУДО КАРД

                   Душанбе, 15 апрел. (АМИТ «Ховар», Бекназари Абӯбакр). — Раиси вилояти Суғд Қоҳир Расулзода ҷиҳати ҷудо намудани маблағ бо мақсади таъмиру тармими ҳаммоми парваришгоҳи наздимактабии №2-и ноҳияи Ашт, суръат бахшидан ба корҳои сохтмону васлкунии иншооти варзишгоҳ барои 25 ҳазор ҷойи нишаст дар шаҳри Хуҷанд, таъмири бинои муассисаи давлатии ТВ «Сафина» дар маркази вилоят ва барои дӯзонидани сарулибоси саҳнавӣ ба раққосагону ҳофизони дастаҳои ҳунарӣ, якчанд қарор ба тавсиб расонид.                   Аз маркази иттилоот ва таҳлили дастгоҳи раиси вилоят ба мухбири АМИТ «Ховар» иттилоъ доданд, ки тибқи қарорҳои мазкур сарраёсати молияи вилоят вазифадор шудааст, ки аз ҳисоби маблағҳои соҳаи маорифи буҷети вилоятӣ барои соли 2009 ба мақомоти иҷроияи ҳокимияти давлатии ноҳияи Ашт 50 ҳазор сомонӣ ирсол намояд. Ин маблағ барои таъмир кардани парваришгоҳи наздимактабии №2-и шаҳраки Шайдони ноҳияи Ашт масраф мегардад.                  Инчунин, аз ҳисоби маблағҳои озоди буҷети вилоятӣ барои таъмиру тармими бинои муассисаи давлатии телевизиони «Сафина» дар вилоят 30 ҳазор сомонӣ ҷудо шуд.                  Бо мақсади омода намудани либосҳои саҳнавӣ барои раққосагону ҳофизони дастаҳои ҳунарӣ аз ҳисоби маблағҳои озоди буҷети вилоятӣ ба ҳисоби муассисаи давлатии вилоятии «Кохи фарҳанг»-и ба номи Абӯабдуллоҳи Рӯдакӣ 10 ҳазору 136 сомонӣ ҷудо гардид.                 Мувофиқи қарори дигари раиси вилояти Суғд барои вусъат бахшидан ба корҳои сохтмонӣ ва васлкунии варзишгоҳ барои 25 ҳазор нафар ҷойи нишаст дар шаҳри Хуҷанд 2 миллиону 500 ҳазор сомонӣ ҷудо гардид.