ДАР ТИФЛИС БА БИНОИ ШАБАКАИ ТЕЛЕВИЗИОНИ МУХОЛИФОН ГРАНАТА ПАРТОФТАНД

                        Тифлис, 25 май. (АМИТ «Ховар» — Лента.ру). — Тибқи хабарҳои аз Гурҷистон расида, шаби душанбе дар бинои шабакаи телевизиони мухолифони ҳукумати мамлакат — «Маэстро» таркиш рух дод. Ин воқеа тақрибан соати 3 — и шаб, дар вақти намоиши барномаи мустақими ҷамъиятию сиёсии «Камераи рақами 5 — ум» ба амал омад. Шахсони номаълум аз берун ба ҳавлии бинои шабакаи телевизионӣ граната партофтанд. Дар бораи осебдидагон то ҳол ягон хабар нарасидааст.                       Сухангӯи шабакаи телевизионии «Маэстро» Заза Папуашвили ин воқеаро шарҳ дода, гуфт, ки дар мамлакат маъракаи террор давом дорад.                    Шабакаи телевизионии «Маэстро» аз ҷараёни намоишҳои эътирозии мухолифини ҳукумат барномаҳои мустақим пахш менамояд, ки истеъфои президент Саакашвилиро талаб менамоянд. Муаллифи барномаи «Камераи рақами 5 — ум» овозхони гурҷӣ Георгий Гачечиладзе мебошад, ки бародари яке аз роҳбарони мухолифон Левон Гачечиладзе аст.                     Ёдовар мешавем, ки намоишҳои эътирозӣ дар Гурҷистон аз аввали моҳи апрели соли равон давом доранд. Мухолифон истеъфои М.Саакашвили ва гузаронидани интихоботи ғайринавбатии парлумону президентро талаб мекунанд.