МУҲОКИМАИ ЛОИҲАИ БАРНОМАИ ҶАЛБИ МУТАШАККИЛОНАИ КОРГАРОНИ МУҲОҶИ

               Душанбе, 4 май. (АМИТ «Ховар», Фарангис Раҳимова). — Имрӯз дар шаҳри Минск маҷлиси навбатии гурӯҳи кории Кумитаи иҷроияи ИДМ баргузор мегардад. Маҷлис ду рӯз давом мекунад. Дар он лоиҳаи Барномаи ҷалби муташаккилонаи коргарони муҳоҷир ба давлатҳои аъзои ИДМ мавриди баррасӣ қарор дода мешавад.              Барномаи мазкур бояд ҳамаи масъалаҳои марбут ба фиристодани коргарон ба мамлакатҳои дигарро ба низом дарорад. Дар он ҷузъиёт ва принсипҳои асосии низоми идораи муҳоҷират инъикос ёфтаанд. Дар ҳуҷҷат роҳу усулҳои ба таври муташаккилона фиристодани коргарони муҳоҷир, ҳуқуқ, вазифа ва ӯҳдадориҳои онҳо аниқ муайян карда мешаванд.             Пешбинӣ карда мешавад, ки ҳуҷҷати мазкур баъди муҳокима ва мувофиқа барои баррасӣ ба Шӯрои сарони ҳукуматҳои ИДМ пешниҳод карда хоҳад шуд.