ОФАТИ ТАБИӢ БА ПАНҶАКЕНТ НИЗ ТАҲДИД МЕКУНАД

                Душанбе, 4 май. (АМИТ «Ховар», Бекназари Абӯбакр). — Бар асари борон ва жолаи шадид ва омадани сел 2 май дар ноҳияи Панҷакент беш аз 30 хона қисман зарар дида, тақрибан ба 500 гектар боғот ва киштзор хисорот расидааст.                 Сардори шӯъбаи ҳолатҳои фавқулодда ва мудофиаи граждании ноҳияи Панҷакент Парвиз Амонов ба мухбири АМИТ «Ховар» иттилоъ дод, ки ин ҳодиса дар маҳаллаҳои даҳсолагии Истиқлолият ва Шодиёнаи шаҳри Панҷакент рух дода, ҳамзамон ба боғот ва киштзори атрофи он зарар расонид. Дар ин ҳодисаи табиӣ 5 сар гови шохдори сокинони деҳаи Тошманори ноҳияро сел ба коми худ кашидааст.               Ӯ афзуд, ки айни замон мақомоти иҷроияи ҳокимияти давлатии шаҳри Панҷакент бо ситоди ҳолатҳои фавқулодда комиссияи махсус таъсис дода, ҷиҳати бартараф намудани оқибатҳои офати табиӣ амалиёти барқароркуниро шурӯъ намудаанд.