РОССИЯ ҲИССАИ ДОВТАЛАБОНРО ЗИЁД НАМУД

              Душанбе, 4 май.(АМИТ «Ховар», Лаззат Диловарзод).- Дар соли хониши 2009-2010 Вазорати маорифи Россия шумораи қабули довталабони тоҷикро тибқи «квота» дар донишгоҳҳои беҳтарини кишвараш зиёд менамояд.               Дар ин бора аз консулгарии генералии дар шаҳри Хуҷанди вилояти Суғд будаи Федератсияи Россия ба АМИТ «Ховар» иттилоъ доданд.             Аз нисф зиёди ҳиссаи пешбинишударо довталабони вилояти Суғд ташкил медиҳанд.             Агар соли 2008 ҳамагӣ 36 ҷой барои вилояти Суғд ҷудо шуда бошад, соли ҷорӣ ин саҳм ба 100 ҷой расонида мешавад. Ба замми ин 5 ҷой барои аспирантҳо ҷудо карда мешавад ва ҳамчунин 20 нафар сокини Суғд имкони гузаштан аз курсҳои такмили ихтисосро дар Федератсияи Россия пайдо мекунанд.             Меъёри асосии қабул- баҳои аъло ва хуб донистани забони русӣ мебошад.              Номзадҳои муносиб ба ҷойи хоб ва стипендия таъмин карда мешаванд.