ҶТ БА ҚДВТ БАТАЛЁНИ ХУДРО МЕФИРИСТАД

                     Душанбе, 8 июн. (АМИТ «Ховар», Наталя Михайлова).- Дар пойтахти Белорусия-Минск маҷлиси навбатии Кумитаи котибони шӯроҳои амнияти Созмони аҳдномаи амнияти дастаҷамъӣ анҷом ёфт. Аз Тоҷикистон дар ин маҷлис муовини котиби Шӯрои амнияти ҷумҳурӣ Акрам Амонов иштирок намуд.                     Дар маҷлис вазъи умумии ҳарбию сиёсӣ ва тамоили рӯйдодҳои минтақаи СААД, тадбирҳои вокуниш ба зуҳурот ва таҳдидҳо ба амнияти минтақа муҳокима шуданд.Иштирокчиёни маҷлис натиҷаҳои амалиёти дастаҷамъии таъҷилию пешгирикунанда ва махсуси «Канал», «Нелегал» ва ғайраро ҷамъбаст карда, силсилаи ҳуҷҷатҳоро дар бораи бунёди низоми муассири муборизаи дастаҷамъӣ ба муқобили зуҳуроту таҳдидҳои замони ҳозира мувофиқа намуданд. Роҳбарони шӯроҳои амният самтҳои асосии фаъолияти созмонро дар давоми соли 2009 ва нимсолаи аввали соли оянда баррасӣ карданд. Инчунин нақшаи машваратҳои намояндагони давлатҳои аъзои созмон роҷеъ ба сиёсати берунӣ, амният, мудофиа ва ғайра мавриди муҳокима қарор доданд.                   Дар маҷлиси умумӣ масъалҳои марбут ба ташкилу фаъолияти Қувваҳои дастаҷамъии вокуниши таъҷилӣ муҳокима шуд.                   14 июн дар Маскав маҷлиси Шӯрои амнияти дастаҷамъӣ баргузор мегардад. Дар он президентҳои ҳамаи мамлакатҳои аъзои созмон ширкат меварзанд. Онҳо созишномаи ниҳоиро дар бораи ташкили Қувваҳои дастаҷамъии вокуниши таъҷилӣ имзо хоҳанд кард.  Тибқи паймони ба даст омада аз Русия дар ин қувваҳо як дивизияи десанти ҳавоӣ ва як бригадаи десантии ҳуҷумкунанда фиристода мешавад. Шумораи хизматчиёни ҳарбии Русия дар қувваҳои мазкур қариб ба 8 000 нафар мерасад. Давлатҳои дигари аъзои созмон- Арманистон, Белорусия, Қирғизистон, Тоҷикистон ва Ўзбекистон ба ҳайати қувваҳои мазкур як балатёнӣ мефиристанд.