ДАР ДУШАНБЕ САФОРАТХОНАИ АРАБИСТОНИ САУДӢ КУШОДА МЕШАВАД

                Душанбе, 30 июн. (АМИТ «Ховар», Наргис Бойаҳмадова). — Вазири корҳои хориҷии Ҷумҳурии Тоҷикистон Ҳамрохон Зарифӣ дар ҷараёни иштироки худ дар мулоқоти ғайрирасмии «Гурӯҳи ҳаштгона» оид ба Афғонистон, ки 26 июни соли 2009 дар шаҳри Триестаи Италия баргузор гардид, бо вазири корҳои хориҷии Канада Лоренсо Кэннон мулоқот анҷом дод.               Дар ҷараёни сӯҳбат масъалаҳои ҳамкории Тоҷикистону Канада, муносибатҳои ду кишвар дар доираи созмонҳои байналмилалӣ, ташаббуси Тоҷикистону Канада дар бобати таъмини сулҳу амният дар Афғонистон, барқарор сохтани иқтисодийти кишвар мавриди муҳокима қарор гирифтанд.                Вазири корҳои хориҷии Тоҷикистон қайд кард, ки дар Афғонистон сохтмони роҳҳои автомобилгард ва оҳан, бунёди сарбанду нерӯгоҳҳои барқии обӣ ва хатти интиқоли барқро ривоҷ додан зарур аст. Ҳ. Зарифӣ таъкид дошт, ки имрӯз ҷомеаи ҷаҳониро имкони таърихие пеш омадааст, то ба Афғонистон ёрӣ расонаду он ба давлати осоишта, босубот ва муваффақ табдил ёбад.                Ҳамон рӯз вазири корҳои хориҷии Ҷумҳурии Тоҷикистон Ҳамрохон Зарифӣ бо вазири корҳои хориҷии Амороти Муттаҳидаи Араб, вазири давлатии корҳои хориҷии Арабистони Саудӣ ва вазири корҳои хориҷии Давлати Исломии Афғонистон мулоқотҳо анҷом дод.                Дар ҷараёни ин мулоқотҳо масъалаҳои ҳамкориҳои дуҷонибаи Тоҷикистон бо ин кишварҳо мавриди баррасӣ қарор гирифтанд.               Дар рафти мулоқоти роҳбарони идораҳои корҳои хориҷии Тоҷикистон ва Арабистони Саудӣ вазири давлатии саудӣ зикр намуд, ки ҳукумати кишвараш ният дорад ояндаи наздик дар Душанбе Сафоратхонаи худро кушояд.                Дар ин бора ба МИТ «Ховар» аз вазорати корҳои хориҷии мамлакат хабар доданд.