ИНТИҚОЛИ ГАЗИ ЎЗБЕКИСТОН БА ТОҶИКИСТОН БОЗ КАМ КАРДА ШУД

                  Душанбе, 17 июн. (АМИТ «Ховар», Кристина Эрлих).- Муовини аввали раиси Ҷамъияти саҳҳомии «Тоҷиктрансгаз» Шавкат Шоимов ба мухбри АМИТ «Ховар» хабар дод, ки дар натиҷаи гуфтушуниди намояндагони роҳбарияти ҷамъиятҳои саҳҳомии «Тоҷиктрансгаз» ва «Ўзтрансгаз» гази табиӣ аз Ўзбекистон ба Тоҷикистон интиқол дода шавад ҳам, ҳаҷми интиқоли он тақрибан 2 баробар кам карда шуд. Қабл аз ин аз Ўзбекситон ба Тоҷикистон дар ҳар соат 12 ҳазор метри мукааб газ интиқол дода мешуд, вале имрӯз ҳаҷми интиқоли он дар як соат 6 ҳазор метри мукаабро ташкил медиҳад. Ин барои ҷумҳурии мо комилан кифоя нест, гуфт Ш. Шоимов.                  Мухбири АМИТ «Ховар» ёдовар мешавад, ки роҳбарияти «Ўзтрансгаз» як рӯз пеш ба ҷониби Тоҷикистон пардохтани қарзи гази истифодашударо хотиррасон намуда, огоҳ карда буд, ки агар маблағи қарз пардохта нашавад, интиқоли газро тамоман қатъ хоҳад кард.                  Ш. Шоимов изҳор намуд, ки ҷамъиятҳои саҳҳомии «Барқи Тоҷик», «Тоҷиксемент» ва «Сомонсуғдгаз» аз ҳисоби гази табиии истифодабурдаашон маблағи калон қарздоранд. Агар онҳо қарзи худро пардозанд, Ўзбекистон ба Тоҷикистон дар ҳаҷми пештара газ медиҳад.                  Тибқи қарордоди имзошуда, Ўзбекистон бояд ба Тоҷикистон дар давоми соли 2009-ум қариб 550 миллион метри мукааб гази табиӣ диҳад. Бояд гуфт, ки Ўзбекистон 1000 метри мукааб гази худро ба Тоҷикистон ба ивази 240 доллари ИМА мефурӯшад.                                                                                                                 Тарҷумон Қудратов А.