ИСЛОҲОТИ ЗАМИН ДАР ВОСЕЪ

                  Восеъ, 25 июн. (АМИТ «Ховар», Сулаймон Холов). — Дар ноҳияи Восеъ тибқи фармони Президенти ҶТ дар бораи тадбирҳои иловагӣ оид ба навташкилдиҳӣ ва ислоҳоти ташкилотҳои кишоварзӣ дар ҳудуди 6 ҷамоат комиссияи навташкилдиҳӣ дар якҷоягӣ бо кумитаи заминсозии ноҳия таҳсис дода шуд, гуфт сардори идораи кишоварзӣ Сайҳомид Саидов ва афзуд, ки 7 хоҷагиҳои калони давраи собиқ шӯравӣ, ки дар майдони 24 ҳазор га замини кишт ба ӯҳда доштанд ба 1 400 хоҷагиҳои деҳқонӣ табдил дода шуданд. Ба гуфтаи ин манбаъ хоҷагиҳои деҳқонии навтаъсис дар майдони 13 ҳазор га кишти ғалла, 8 ҳазор га пахта, 520 га сабзавот, 60 га кишти картошка, 200 га полезӣ, 1 775 га зироатҳои хӯроки чорво кишт гузарониданд. Мавриди зикр аст, ки гарчанде дар ноҳия 1 400 хоҷагиҳои деҳқонӣ таъсис гардида бошад ҳам, аммо баъзе камбудиҳо дар ин самт ҷой дошта аксари деҳқонон бе саҳми замин ва амвол монданд. Айни ҳол дар ноҳия азнавташкилдиҳӣ ва интихоби шакли ташкилию ҳуқуқии ташкилотҳои кишоварзӣ бо қарори муассис ё мақомоти он сурат мегирад, афзуд С. Саидов.