АЗ ҶУМҲУРИИ ОЗАРБОИҶОН КӮМАК МЕРАСАД

                Душанбе, 23 июл. (АМИТ «Ховар», Лаззат Диловарзод).- Аз Вазорати рушди иқтисод ва савдо иттилоъ доданд, ки Ҷумҳурии Озарбоиҷон барои бартараф кардани оқибатҳои офати табиӣ, ки дар моҳҳои марту апрели соли ҷорӣ ба сари аҳолии чанд маҳали вилоятҳои Хатлону Суғд омада буд, 100 ҳазор доллари амрикоӣ ҷудо намудааст.                 Боиси ёдоварист, ки соли ҷорӣ дар натиҷаи боришҳои пай дар пай бештар аз 500 оила дар вилояти Хатлон зарари молиявӣ дид. Ин пеш аз ҳама ба ноҳияҳои Хуросон ва Панҷи вилояти ҳатлон дахл дорад.                 Ҳоло дар ноҳияи Хуросон бо дастгирию кӯмаки Ҳукумати ҷумҳурӣ қариб 150 оила бо хона таъмин карда шуда, сохтмони мактаб барои 700 нафар хонанда ва бунгоҳи тиббӣ барои аҳолии шаҳраки навбунёд идома дорад.                Ба аҳолии зарардидаи ин ноҳия кӯмакҳои башардӯстонаи Федератсияи Русия , Ҷумҳуриҳои Қазоқистону Ӯзбекистон дар рӯзҳои нахустини баъди ҳодисаҳои табиӣ ворид гардида буд.