БАРОИ ИҶРОИ БАРЗИЁДИ АНДОЗ ЗАМИНА ҲАСТ

                     Душанбе, 21 июл. (АМИТ «Ховар», Бекназари Абӯбакр). — «Дар давоми шаш моҳи аввали ҷорӣ нақшаи андозҳо ва дигар пардохтҳои ҳатмӣ ба андозаи 105,7 фоиз таъмин гардида, ба ҷойи 973,3 миллион сомонии пешбинишуда ба буҷет 1029,2 миллион сомонӣ ворид карда шуд, ки ин нишондод нисбат ба ҳамин давраи соли гузашта 189,2 миллион сомонӣ зиёд аст», — гуфт дар ҷараёни нишасти матбуотӣ 21 июл, раиси Кумитаи андози назди Ҳукумати Ҷумҳурии Тоҷикистон Нусратулло Давлатов.                      Дар ин давра иҷрои ду намуди андоз, аз ҷумла боҷи давлатӣ 91,5 фоиз ва андоз аз фурӯши нахи пахта 87,8 фоиз иҷро гардид, ки аз ин ҳисоб ба буҷет 4 миллион сомонӣ кам ворид шуд.                      Бояд гуфт, ки дар баробари ин, бақияи қарзи андоз ва пардохтҳо ба ҳолати 1 июл 619,3 миллион сомониро ташкил намуда, нисбат ба якуми январи соли равон ба андозаи 108,4 миллион сомонӣ афзудааст.                      Барои андешидани чораҳои маҷбӯран ситонидани бақияи қарзи андозҳо ва пардохтҳо аз тарафи мақомоти андоз дар нимсолаи аввали соли ҷорӣ дар 592 маврид ба маблағи 202,9 миллион сомонӣ нисбати андозсупорандагони қарздор ба судҳо маводҳо фиристонида шуда, дар 344 маврид ба маблағи 50 миллион сомонӣ аз ҷониби судҳо ҳалнома бароварда шуд.                      Дар фарҷом Н. Давлатов ба саволҳои хабарнигорон посух дода, таъқид кард, ки бо дарназардошти таъсири бӯҳрони ҷаҳонии молиявӣ-иқтисодӣ ва ба ин васила суст шудани раванди истеҳсолот, роҳбарияти Кумитаи андоз мекӯшад ҷамъоварии андозро барзиёд иҷро кунад. Ҷиҳати иҷрои барзиёди ҷамъоварии андозҳо сарчашмаҳои эътимодбахш мавҷуданд.