БОЛО РАФТАНИ НАРХИ ГАЗ ФАЪОЛИЯТИ КОРХОНАРО БОЗДОШТ

                 Душанбе, 1 июл. (АМИТ «Ховар», Лаззат Диловарзод).- Бино ба иттилои директории корхонаи муштараки «Тоҷиказот»-и вилояти Хатлон Тоирхон Ғозиев, корхона аз моҳи декабри соли 2008 бо сабаби болоравии нархи газ аз фаъолият бозмонд. Беш аз 600 нафар кормандони корхона ба рухсатии меҳнатии бемузд ҷавоб дода шуданд.                Дар соли 2008 корхона ба буҷа 13 млн. сомонӣ андоз ворид намуд. Айни замон корхона 200 нафар мутахассисони ботаҷрибаро нигоҳ доштааст. Роҳбарияти корхона аз он ҳарос дорад, ки дар сурати аз кор рафтани ин 200 нафар ихтисосманд, дигар фаъолият карда наметавонад.                Ба гуфти Тоирхон Ғозиев, агар мо фирефтаи маҳсулоти арзони хориҷӣ шавему фаъолияти корхонаҳои худро қатъ кунем, ҳамаи маҳсулоти арзони хориҷии имрӯзаро фардо бо нархи даҳчанд харидорӣ хоҳем кард.