ДАР ХОРУҒ 2 МЕҲМОНХОНАИ НАВ СОХТА МЕШАВАД

                 Бадахшон, 17 июл. (АМИТ «Ховар», Л. Додо).- Рӯзи 17-уми июл бо амри Президенти кишвар ҳайати намояндагии Ҳукумати Ҷумҳурӣ таҳти сарпарастии Сарвазири мамлакат Оқил Оқилов вориди шаҳри Хоруғ гардид. Дар ҳайат вазири рушди иқтисод ва савдо, вазири нақлиёт ва коммуникатсия, вазири фарҳанг, раиси Бонки миллӣ инчунин раиси Кумитаи давлатии омор, директори Агентии сохтмон ва меъморӣ, Президенти Академияи илмҳои ҷумҳурӣ, директори генералии КВД «Хоҷагии манзилию коммуналӣ», сардори саридораи геология, муовинони вазири маориф, энергетика ва саноат, раиси Бонки амонатгузории «Амонатбонк» мудири котиботи сарвазири ҷумҳурӣ, директори Маркази татбиқи лоиҳаи инвеститсионии роҳсозӣ, сармутахассиси шӯъбаи идораи Хоҷагии ДИПҶТ ҳастанд. Тавре садри дастгоҳи раиси ВМКБ Хушқадам Хушқадамов иттилоъ дод, мурод аз вориди Бадахшон гардидани чунин ҳайати бонуфузи ҳукуматӣ ин омодагӣ ба Рӯзи ваҳдати соли 2010, ки дар шаҳри Хоруғ баргузор мегардад, мебошад. Худи ҳамин рӯзҳо бо маблағи ТАЛКО сохтмони ду меҳмонхона барои 44 ва 75 нафар ва бо маблағи «Амонатбонк», чойхонаи замонавӣ бо тарҳи меъморию шарқӣ дар шаҳри Хоруғ оғоз мегардад.     Намояндагони вазоратҳо, кумитаҳою идороти дигар бошанд дар боби беҳбудии соҳаи хеш низ корҳои мушаххасро анҷом медиҳанд.