ИМЗОИ СОЗИШНОМАИ ҲАМКОРӢ

                  Душанбе, 2 июл. (АМИТ «Ховар», Зебо Иноятова).- Дар хадамоти гумруки назди Ҳукумати Ҷумҳурии Тоҷикистон 30 июни соли 2009 маросими имзои Созишномаи ҳамкории Хадамоти гумруки Ҷумҳурии Тоҷикистон ва Ширкати илмию истеҳсолии «Р.И.С.К.»-и Ҷумҳурии Озарбойҷон баргузор гардид.                  Ширкати мазкур дар тендери бахшида ба масъалаи татбиқи системаи ягонаи автоматикунонидашудаи иттилоотӣ ғолиб баромада буд. Ҳадафи созишнома амалӣ сохтани «Барномаи минтақавии беҳтар сохтани фаъолияти гумрук ва рушди фаъолияти муассисаҳои ёрирасони Хадамоти гумруки назди Ҳукумати Ҷумҳурии Тоҷикистон» мебошад. Созишнома бо кӯмаки молиявии Бонки рушди Осиё амалӣ карда мешавад.                   Татбиқи барномаи мазкур ба соддагардонӣ ва ҳамоҳангсозии расмиёти гумрукӣ, беҳтар намудани фаъолияти гумрукӣ, такмили технологияи назорат ва ба расмиятдарории гумрукӣ бо истифодаи самараноки технологияи иттилоотии коммуникатсионӣ ва дар ин замина ба афзоиши тиҷорати хориҷӣ ва ҷамъоварии пардохтҳои гумрукӣ мусоидат хоҳад кард.