КАМ ШУДАНИ ВОРИДОТ ВА СОДИРОТ БА БУҶАИ ВИЛОЯТИ СУҒД ТАЪСИРИ МАНФИ РАСОНИД

                    Душанбе, 7 июл. (АМИТ «Ховар», Бекназари Абӯбакр). — 6 июли соли ҷорӣ дар ҷаласаи Шӯрои ҳамоҳангсозии назди раиси вилояти Суғд масъалаҳои таъмини бозори дохилӣ, рушд ва такомули робитаҳои иқтисодӣ, савдои беруна баҳри таъмини амнияти иқтисоди кишвар, баррасӣ шуданд. Дар ин бора ба АМИТ «Ховар» аз маркази иттилоот ва таҳлили дастгоҳи раиси вилояти Суғд иттилоъ доданд.                    Сарвари вилояти Суғд Қоҳир Расулзода баррасии ин масъаларо дар шароити кунунии бӯҳрони молиявӣ-иқтисодӣ муҳим арзёбӣ карда, зикр намуд, ки дар ин раванд пеш аз ҳама ба амалӣ намудани супоришҳои Сардори давлат Эмомалӣ Раҳмон дар мавриди таъмини амнияти озуқаворӣ, истифодаи самараноки замин, ташкили ҷойҳои нави корӣ, ба танзим даровардани сатҳи вобастагии бозори истеъмолӣ аз молу маҳсулоти бесифат, баланд бардоштани иқтидори содиротӣ, танзими воридот ва нархи анвоъ, гардиши савдои беруна, эътибори ҷиддӣ аз ҷониби мақомоти дахлдор зоҳир карда шавад.                     Таҳлилҳо нишон медиҳанд, ки дар вилоят нисбат ба ҳамин давраи соли гузашта, сатҳи воридот ва содирот аз рӯи баъзе намудҳои маҳсулот паст рафтааст, ки он дар маҷмӯъ ба ғанигардонии буҷа таъсири манфӣ расонид.                     Қоҳир Расулзода бо таҳлилҳои амиқ аз ҳанӯз ҷой доштани проблемаҳоро дар самти барасмиятдарории гумрукӣ, ҳифзи бозори дохилӣ аз маҳсулотҳои пастсифати воридшаванда ва пешгирии он изҳори нигаронӣ кард.                     Дар фарҷом раиси вилоят ҷиҳати бартараф намудани камбудиҳои мавҷуда ба масъулин супоришҳои мушаххас дод.