НАМОИШИ ЭЪТИРОЗИИ САВДОГАРОНИ БОЗОРИ ЧЕРКИЗ ДАР МАСКАВ

                Маскав, 29 июл. (АМИТ «Ховар» — Риан.Ру).- Ҷунбиши «Ҷабҳаи чап» ва савдогарони бозори басташудаи Черкиз дирӯз, 28 июл дар майдони Новопушкинскийи маркази шаҳри Маскав намоиши эътирозӣ ташкил намуда, ҳукуматдоронро даъват карданд, ки бозори мазкурро дубора кушоянд. Дар намоиш роҳбарону намояндагони ҳизби «Яблоко» ва ҳизби коммунисти Русия ҳузур доштанд.                Намоишгарон изҳор доштанд, ки дар натиҷаи баста шудани бозори Черкиз ҳазорон нафар одамон бекор мондаанд. Онҳо то имрӯз барои худ кор пайдо карда наметавонанд. Яке аз роҳбарони ҷунбиши «Ҷабҳаи чап» Сергей Удалцев изҳор намуд, ки баста шудани бозори Черкиз натиҷаи бӯҳрони амиқи фаъолияти ҳукуматдорони Маскав мебошад. Вай тамоми масъулияти баста шудани бозорро ба зиммаи Ҳукумати Маскав гузошт.                 Намоишгарон ба Ҳукумати шаҳри Маскав муроҷиатнома қабул карда, талаб намуданд, ки бозор дар давоми рӯзҳои наздик кушода, гунаҳкорони баста шудани он ба ҷавобгарӣ кашида, роҳбарияти Маскав ба истеъфо бароварда шавад. Изҳор карда шуд, ки агар талаботи мазкур иҷро нашавад, рӯзҳои наздик намоиши эътирозии доманадортар ташкил карда хоҳад шуд.                  Аз рӯи маълумоти Федератсияи муҳоҷирони Русия, дар натиҷаи баста шудани бозори Черкиз қариб 100 ҳазор нафар аз кор маҳрум гардид. Ҳол он ки дар бозори мазкур ҳамагӣ 14,2 ҳазор ҷои кор мавҷуд буд.                                                                                                       Тарҷумон — Қудратов А.