ҲАЛОКАТИ КОРМАНДИ САҲА ДАР ХАРАНГОН

                    Душанбе, 10 август. (АМИТ «Ховар», Наталя Михайлова). — Корманди Дафтари Созмони амнияту ҳамкории Аврупо дар Тоҷикистон Чеслав Белявский 9 август дар дараи Харангон дар масофаи даҳкилометрии самти шимолии шаҳри Душанбе ба таври фоҷиавӣ ҳалок шуд.                      Чеслав Белявский кӯҳнаварди касбӣ буда, дар мавзеи Харангон ба шаш нафар корманди созмонҳои байналхалқӣ ва сафоратхонаҳои хориҷӣ машғулияти кӯҳнавардӣ мегузаронд. Дар натиҷаи носозии техникии асбобу анҷоми кӯҳнавардӣ Ч.Белявский аз баландии 25 метр ба замин афтод ва маҷрӯҳ шуда, дар натиҷа вафот кард.                       Субҳи 10 август дар ибодатхонаи католикии шаҳри Душанбе ҷанозаи марҳум хонда шуд. Ҷасади ӯ бо ҳавопаймо ба ватанаш — Лаҳистон фиристода мешавад.                       Ч.Белявский дар Тоҷикистон аз моҳи апрели соли 2009 то имрӯз кор мекард. Ӯ аз Лаҳистон ба Душанбе фиристода шуда буд.