БАЪЗЕ АЗ КӮЧАҲОИ ДУШАНБЕ ТО 1-СЕНТЯБР БАСТА МЕШАВАНД

                     Душанбе, 4 август.(АМИТ «Ховар», Марзия Саидова).-Муддати як моҳ- то 1 -уми сентябр роҳи кӯчаи Шотемур аз чорсӯи хиёбони Рӯдакӣ, инчунин, чорсӯи кӯчаҳои Ф.Ниёзӣ, Шероз ва Теҳрон баста мешавад.                    Тибқи иттилои котиби матбуотии Раиси шаҳри Душанбе Шавкат Саидов бо назардошти таъмиру таҷдиди қубурҳои селпарто ва беҳдошти вазъи ободонӣ дар пойтахт ҳаракат ва рафтуои нақлиёт дар ин кӯчаҳо қатъ карда шуда, тавассути дигар самтҳо ба роҳ монда шудаанд. Аз ин рӯ, ҳаракати троллейбуси №1 аз боғи Айнӣ то Универмаги марказӣ ба роҳ монда шудааст.                     Ш. Саидов афзуд, ки дар кӯчаи Шотемур қубури селпартои дарозиаш 60 метра, ки ҳанӯз дар соли 1974 насб гардида буд ба қубури қутраш 2,5 х 2 метр иваз карда мешавад.Бояд тазаккур дод, ки дар мавсими баҳори имсола дар натиҷаи боридани боронҳои пайдарпаи сел қубури мазкур тоб наовард ва дар натиҷа як қатор кӯчаю хиёбонҳои марказии пойтахт зери сел ва лойқа монда, ба иқтисодиёти шаҳр ҳисорот ворид гардида буд.