ДАР ТУРСУНЗОДА БЕМОРИИ ТАБЛАРЗАИ ХУНИН БА ҚАЙД ГИРИФТА ШУД

                      Душанбе, 7 август. (АМИТ «Ховар», Ибодат Давлатова). — Аз дафтари матбуоти вазорати тандурустии ҷумҳурӣ ба АМИТ «Ховар» хабар доданд, ки аз 5 сокини ба бемории табларзаи хунин гирифторшудаи ноҳияи Турсунзода 3 нафар вафот кард.                      Дар хабари вазорат гуфта мешавад, ки айни ҳол дар ноҳияи Турсунзода 26 нафар бо ташхиси бемории мазкур дар шифохона ҷой дода шуд. Ҳамаи онҳо таҳти назорати духтурон қарор доранд.                     Дар робита гурӯҳи кории вазорати тандурустии ҷумҳурӣ таҳти роҳбарии вазир Нусратулло Салимов ба ноҳияи Турсунзода рафт. Духтурон манбаи пайдоиши бемориро муайян карда, барои пешгирии паҳн гардидани он тадбирҳо меандешанд ва сабабҳои пайдоиши беморӣ ва роҳҳои табобати онро ба аҳолӣ мефаҳмонанд.                     Мутахассисони вазорат маслиҳат медиҳанд, ки дар мавриди то 40 дараҷа баланд шудани ҳарорати бадан, сустии аъзо, пайдо шудани дард дар банду буғум ва мушакҳо фавран ба духтур муроҷиат карда шавад. Зеро бемории мазкурро дар мавриди сари вақт ошкор гардиданаш табобат кардан мумкин аст.                     Бо таъсири бемории табларзаи хунин ҷараёни шахшавии хун халалдор мегардад. Дар давраи беморӣ дар бадани бемор ва дасту пойҳои ӯ доғҳои хунин пайдо шуда, аз биннӣ, меъда ва узвҳои дигари инсон хун меравад.                     Тарҷумон — Қудратов А.