ҶАСАДИ РОНАНДАИ ТАКСӢ ДАРЁФТ ШУД

                Душанбе, 10 сентябр. (АМИТ «Ховар», Жасмин Назарова). – Тавре ба хабарнигори АМИТ «Ховар» аз дафтари матбуоти Вазорати корҳои дохилии ҶТ иттилоъ доданд, ҷасади шаҳрванди 22 солаи шаҳри Душанбе, ронандаи таксӣ А. Муродов бо аломатҳои марги маҷбурӣ дарёфт карда шуд.                Дар вақти гузаронидани чораҳои фаврӣ-ҷустуҷӯӣ, хизматчиёни шартномавии қисми ҳарбии 28804 Федератсияи Россия сержанти хурд Дмитрий Кучман, соли таваллудаш 1989 сокини шаҳри Калинингради ФР ва сержанти хурд Вячислав Чернов, соли таваллудаш 1987, сокини вилояти Кирови ФР дастгир карда шуданд. Тибқи маълумот ҷинояткорон А. Муродовро ба қатл расонда мошини ӯро дуздида бурданд. Кормандони милитсия ҷинояткоронро дар ноҳияи Хуросон дастгир карданд. Нисбати ин воқеа парвандаи ҷиноӣ боз шуд. Тафтишот идома дорад.