15 –УМИ СЕНТЯБР ВАЗОРАТИ МАОРИФ БА СУДИ ИҚТИСОДӢ ДАЪВАТ МЕШАВАД

                Душанбе, 14 сентябр. (АМИТ «Ховар», Лаззат Диловарзод).- Бино ба гуфти вакили дифои Донишкадаи технологияи инноватсионӣ ва коммуникатсионии Тоҷикистон Шӯҳрат Қудратов, 30 юми июли соли ҷорӣ Суди иқтисодии шаҳри Душанбе фармони вазири маорифро нисбат ба қатъ кардани фаъолияти донишкадаи мазкур беасос донист ва баъд аз гузаштани чанд рӯз суд аз ин тасмими худ даст кашид.                 Судяи Суди иқтисодии шаҳри Душанбе Хосият Маҳмадиева рӯзи 3 — юми сентябр дар ҷаласаи судӣ, ки бо иштироки тарафҳо сурат гирифт мурофиаи судиро 15 –уми сентябр таъин кард.                Муовини вазири маориф Фарҳод Раҳимов, ки намояндаи ҷавобгар мебошад, нисбат ба таъхир андохтани баррасии парванда хавф аз он дорад, ки ҳалли қазияи мазкур метавонад ба фоидаи донишкада гардад.               Боис ба ёдоварист, ки вазири маориф қабули довталабонро дар донишкадаи мазкур барои соли 2009 – 2010 23 – юми июл манъ намуд ва баъди як моҳ 20 –уми август 00 иҷозатномаи фаъолияти донишкадаро низ қатъ намуд.               Акнун дар Суди иқтисодӣ маълум хоҳад шуд, ки ғалабаро муассиси донишкада, ки шаҳрванди Амрикост, ба даст меорад ё Фарҳод Раҳимов, ки намояндаи ҷавобгар аст.