ЗАМИН МАНБАИ ДАРОМАД

                 Восеъ, 14 сентябр. (АМИТ «Ховар», Сулаймон Холов).- Бар асоси иттилои ҷонишини раиси Кумитаи заминсозии ноҳияи Восеъ Мирзо Хоркашов дар давоми 9 моҳи соли ҷорӣ кормандони кумитаи заминсозии ноҳия нисбати 110 нафар қонунвайронкунандагони замин ба маблағи 29 ҳазору 950 сомонӣ ҷаримабандӣ намуд, ки аз ин маблағ 21 ҳазору 700 сомониаш ба суратҳисоби махсус ворид карда шудааст. Ба гуфтаи ин манбаъ аксари қонунвайронкунандагон аз ҷамоатҳои Пахтаобод ва Пахтакор ба қайд гирифта шуда, нисбати онҳо 62 мавод ба суд ва 5 мавод ба прокуратура пешниҳод гардидааст. Мирзо Хоркашов аз он изҳори нигаронӣ намуд, ки бархе аз шаҳрвандон заминҳоро худсарона ишғол менамоянд. Дар ин давра 13 нафар ба қайд гирифта шуд, ки заминҳояшон баргардонида гирифта шудаанд.