ҲАРАКАТИ НАҚЛИЁТ ДАР БАЪЗЕ КӮЧАҲО ҚАТЪ МЕГАРДАНД

                  Душанбе, 13 октябр.(АМИТ «Ховар», Марзия Саидова).-Бо сабаби гузаронидани корҳои азнавсозии хатти коррезӣ аз 10 то 17 октябри соли равон ҳаракати нақлиёт дар кӯчаи Шероз аз буриши кӯчаи Шотемур то буриши кӯчаи Фотеҳ Ниёзӣ ва аз 17 то 27 октябр қисмати кӯчаи Шотемур аз буриши кӯчаи Нозим Ҳикмат то буриши кӯчаи Шероз қатъ карда мешаванд.                   Раиси шаҳри Душанбе Маҳмадсаид Убайдуллоев дар робита доир ба андешидани чораҳо ҷиҳати таъмини бехатарии ҳаракат дар кӯчаҳои Шероз ва Шотемур қарор ба имзо расонд.                   Тибқи муқаррароти банди 1-уми қарори мазкур муассисаи давлатии коммуналии «Душанбенақлиётхадамотрасон» ва раёсати хадамоти давлатии назорат ва танзим дар соҳаи нақлиёти шаҳри Душанбе муваззаф гардидаанд, ки самти ҳаракати нақлиёти мусофирбариро, ки аз кӯчаҳои дар боло зикршуда мегузаранд, таъмин намоянд.                    Назорати иҷрои Қарори мазкур ба зиммаи муовини Раиси шаҳри Душанбе Ҷамшед Саидов вогузор гардидааст.