ҲОЛАТҲОИ ҚОНУНВАЙРОНКУНИИ ЗАМИН БАРТАРАФ ШУД

                 Душанбе, 12 октябр. (АМИТ «Ховар», Лаззат Диловарзод).- Дар 9 моҳи соли ҷорӣ раёсату шӯъбаҳои дастгоҳи марказии Агентии заминсозӣ, геодезӣ ва харитасозии назди Ҳукумати ҷумҳурӣ дар якҷоягӣ бо корхонаҳои тобеъ ва кумитаҳои заминсозии вилоятҳо дар бахши риояи қонунгузории замин 7915 адад ҳолатҳои қонунвайронкунии истифодаи заминро ошкор намуданд.                 Аз ҷумла, дар вилояти Хатлон 3837 адад, Суғд – 2217, ВМКБ -196 ва дар ноҳияҳои тобеи ҷумҳурӣ 1507 ҳолати қонунвайронкунии замин аз ҷониби кумитаҳои заминсозии агентии мазкур ошкор карда шудааст, — иброз дошт сардори Агентии заминсозӣ, геодезӣ ва харитасозии назди Ҳукумати ҷумҳурӣ Маҳмадтоир Зокиров. Агентӣ нисбати 3668 ҳолати қонунвайронкунии замин чораҳои маъмурӣ андешида, ба маблағи умумии 1 млн. 345 ҳазору 118 сомонӣ нисбати заминистифодабарандагон ҷарима баст, 496 мавод ба мақомоти прокуратура, 951 мавод ба мақомоти судӣ ирсол намуда, 4861 ҳолатҳои қонунвайронкунии замин бартараф карда шуд.                 Дар ин муддат 156 қарор, аз ҷумла, 41 қарори раисони ноҳияҳо, 95 қарори раисони деҳот ва 20 қарори хоҷагиҳои кишоварзӣ дар вилояти Суғд бекор карда шуданд.