ЧАРО ДАР НБО САДАМА БА АМАЛ МЕОЯД?

                 Душанбе, 31 октябр. (АМИТ «Ховар» Наргис Бояаҳмедова). — Дар маркази ҷумҳуриявии матбуот бо иштироки роҳбарони вазорати мелиоратсия ва хоҷагии оби мамлакат, намояндагони СММ, Комиссияи Аврупо, мутахассисону олимон аз Русия ва кишварҳои Осиёи Марказӣ доир ба бехатарии сарбандҳои об маҷлиси машваратӣ баргузор карда шуд.                 «Яке аз сабабҳои асосии сар задани садамаҳои бузурги техникӣ дар иншооти гидроэнергетикӣ дар ҳама рӯи ҷаҳон, на худи сарбандҳо ва иншоот, балки омили одамӣ мебошад, вақте ки хадамоти гуногуни истифодабарӣ омода нестанд ва аз ӯҳдаи бартараф кардани ҳолатҳои садамавӣ саривақт баромада наметавонанд», — ба чунин хулоса омаданд иштирокдорони ин маҷлис.                 Ҳамчунин қайд карда шуд, ки дар Осиёи марказӣ иншооти гидроэнергетикӣ, яке намудҳои паҳншудаи сохтмон мебошад ва ин мушкилот, яъне таъмини бехатарии иншооти гидроэнергетикӣ рӯз то рӯз аҳамияти хоса касб мекунад, зеро сарбандҳои обӣ ҳанӯз 40 — 50 сол пеш бунёд шуда буданд. Бинобар ин иншоот аз мутахассисон масъулияти ҷиддӣ дар истифодабарӣ талаб мекунанд.