ГУЗАШТАН БА ЛАМПАҲОИ КАММАСРАФ ИН САРФАКОРИСТ

                 Душанбе, 7 октябр. (АМИТ «Ховар», Лаззат Диловарзод).- Гузаштан ба лампаҳои каммасраф сарфаи нерӯи барқро аз ҳисоби аҳолии кишвар 3 млрд. 120 млн. кам хоҳад кард. Агар ба таври дигар гӯем, ин сарфакорӣ ба ҳаҷми истеҳсолии нерӯгоҳи барқи обии иқтидораш 810 мег.Ват баробар аст,- иброз доштанд дар ширкати «Барқи тоҷик» ба мухбири АМИТ «Ховар».                 Дар Ҷумҳурии Тоҷикистон фаслҳои тирамоҳу зимистон норасоии барқ ба 4 – 4,5 млрд. кВт соат мерасад. Ба лампаҳои каммасраф гузаштан алҳол наметавонад, ки дар фасли зимистон аз рӯи лимит додани барқро аз байн бардорад, вале он метавонад ба кори барқчиён сабукиҳои зиёд орад. Аз ҷумла, бори трансформатор ва таҷҳизоти барқӣ хеле сабук гардида, садамаҳои барқиро дар кори онҳо 2 – 3 маротиба кам мекунад.   Аз рӯи ҳисобу китоби мутахассисон дар як сол садамаи 100 – 120 трансформаторҳои пуриқтидор, ки ҳар кадоми он 60 – 80 ҳазор доллар қиммат дорад, кам мегардад, ки аз ин ҳисоб давлат беш аз як миллион доллари амрикоӣ фоида мебинад.