КЕННЕТ ГРОСС: «МАН АЗ БОЗГАШТ БА ТОҶИКИСТОН ШОДАМ»

                   Душанбе, 2 октябр. (АМИТ «Ховар», Пайрав Назаров). – Тавре хабар дода шуда буд, субҳи имрӯз сафири нави фавқулодда ва мухтори ИМА дар Тоҷикистон Кеннет Гросс ба Президенти Ҷумҳурии Тоҷикистон Эмомалӣ Раҳмон эътиборнома супорид.                    Сафири нави ИМА баъди мулоқот бо Президент зимни сӯҳбати мухтасар бо хабарнигорон изҳор намуд, ки аз бозгашт ба Тоҷикистон ниҳоят шод мебошад. Ӯ дар бораи самтҳои асосии фаъолияташ дар вазифаи сафири ИМА дар Тоҷикистон сухан ронда, зикр кард, ки ба самтҳои таъмини амният, густариши ҳамкории гуногунҷабҳаи Тоҷикистону ИМА ва рушди фаъолияти сохторҳои демократӣ диққати асосӣ хоҳад дод.                     Ман кӯшиш хоҳам кард, ки муносибатҳои дӯстона ва ҳамкории самарабахши мутақобилан муфиди мамлакатҳоямон боз ҳам бештар равнақу ривоҷ ёбанд, гуфт сафир.                    Мухбири АМИТ «Ховар» хабар медиҳад, ки К.Гросс то сафири ИМА дар Тоҷикистон таъин шуданаш, дар намояндагии дипломатии ИМА дар шаҳри Басраи Ироқ кор мекард.                    Ӯ дар давоми солҳои 2002 – 2004 дар вазифаи муовини намояндагии дипломатии мамлакаташ дар Тоҷикистон кор кардааст. К.Гросс соли 1987 ба хизмати дипломатӣ шурӯъ кардааст. Ӯ солҳои гуногун дар намояндагиҳои дипломатии ИМА дар Гаити, Малайзия, Непал ва Олмон кор кардааст. К.Гросс дастпарвари Донишгоҳҳои Оберн ва Ҷорҷия буда, дар донишкадаи миллии ҳарбӣ унвони илмии магистрро ба даст овардааст. Ӯ бо забонҳои тоҷикию олмонӣ ва фаронсавӣ озодона сӯҳбат мекунад.