КОНФРОНСИ ИЛМӢ ДАР КИТОБХОНАИ МИЛЛӢ

                 Душанбе, 29 октябр. (АМИТ «Ховар» — Людмила Дубинина, Фирдас Таваров). – Имрӯз дар Китобхонаи миллии ба номи Абулқосим Фирдавсӣ конфронси илмӣ бахшида ба 15 — солагии қабули Қонуни асосӣ — Сарқонуни Ҷумҳурии Тоҷикистон оғоз ёфт.                 Конфронс бо ташаббуси Кумитаи ҳолатҳои фавқулодда ва мудофиаи гражданӣ, вазорати фарҳанг, Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва Китобхонаи миллӣ гузаронида мешавад. Дар конфронс оид ба кафолати ҳуқуқ ва озодиҳои инсон аз ҷониби Сарқонун, ӯҳдадориҳои ҷавонон дар назди Ватан ва дигар мавзӯъҳои муҳими рӯз маърӯзаҳо ва муколама бо иштирокчиён ташкил карда мешавад. Дар доираи конфронс дар толори китобхонаи миллӣ намоишгоҳи китоб низ баргузор карда хоҳад шуд.