МУЛОҚОТИ Э. РАҲМОН БО ТЙЕРРИ МАРИАНИ

              19 уми октябри соли 2009 Президенти Ҷумҳурии Тоҷикистон Эмомалӣ Раҳмон намояндаи Президенти Ҷумҳурии Фаронса дар Афғонистон, Покистон ва Осиёи Марказӣ Тйерри Марианиро ба ҳузур пазируфт.               Дар мулоқот масоили ҳамкории Тоҷикистону Фаронса баррасӣ шуд.              Сарвари давлат Эмомалӣ Раҳмон Фаронсаро «шарики асосии Тоҷикистон дар Аврупо» номида, таъкид дошт, ки «мо ба таҳкиму тавсиа додани муносибатҳои гуногунҷанба бо он манфиатдорем, аз ҷумла ба густариши робитаҳои ҳарбӣ-сиёсӣ».              Тйерри Мариани ба таҷрибаи сулҳоварии Тоҷикистон баҳои баланд дода, аз ҷумла изҳор дошт, ки «андешаю пешниҳодҳои Шумо баҳри барқарор сохтани оромию субот дар Афғонистон барои нерӯҳои эътилофии посдори сулҳ бисёр муҳим аст».                Масоили вобаста ба рушди ҳамкории минтақавӣ дар Осиёи Марказӣ бо фарогирии Афғонистону Покистон аз мавзӯъҳои асосии сӯҳбат буд.               Таваҷҷӯҳи зиёд ба татбиқи лоиҳаҳои иқтисодии Тоҷикистон зоҳир карда шуд. Таъкид гардид, ки татбиқи аксари лоиҳаҳои инфрасохтории Тоҷикистон, аз ҷумла доир ба сохтмони нерӯгоҳҳои обӣ, хатҳои интиқоли нерӯи барқ, роҳу пулҳо ва ғайра дорои аҳамияти бузурги минтақавӣ мебошанд.                Таҷдиди фурӯдгоҳи шаҳри Душанбе, ки лоиҳаи асосии ҳамкории имрӯзаи иқтисодии ду кишвар аст, ба иттилои намояндаи Президенти Фаронса тобистони соли 2011 анҷом меёбад.                Бо таваҷҷӯҳ ба таъсири Афғонистон ба авзои кишварҳои минтақа ҳарду ҷониб омодагии худро баҳри таҳкиму густариши ҳамкории ҳарбӣ-сиёсӣ ва амниятӣ, аз ҷумла барои пурзӯр намудани мубориза бо гардиши ғайриқонунии маводи мухаддир таъкид намуданд.