ПИРОНСОЛОНУ МАЪЮБОН ЗЕРИ ПАРАСТОРИИ ДАВЛАТ ҚАРОР МЕГИРАНД

                  Душанбе, 9 октябр. (АМИТ «Ховар», Бекназари Абӯбакр). — Аз ҷониби Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати меҳнат ва ҳифзи иҷтимоии аҳолии ҶТ дар давоми нӯҳ моҳи соли ҷорӣ дар осоишгоҳу истироҳатгоҳҳои ҷумҳурӣ 1460 нафар собиқадорони ҷангу меҳнат, нафақахӯрону эҳтиёҷмандон ба табобату истироҳат фаро гирифта шуд. Дар хона-интернатҳои пиронсолону маъюбон ва дигар муассисаҳои статсионар 1417 нафар бошандагон зери парастор ва нигоҳубини давлат қарор дода шудаанд.                   Дар Агентии мазкур ба мухбири АМИТ «Ховар» гуфтанд, ки барои дар сатҳи баланд ва босифат гузаронидани мавсими истироҳатию табобатии собиқадорони ҷангу меҳнат Муассисаҳои давлатии «Осоишгоҳи собиқадорони ҷангу меҳнати «Харангон»-и ноҳияи Варзоб, истироҳатгоҳҳои собиқадорони ҷангу меҳнати «Дӯст»-и ноҳияи Қумсангир, «Ромит»-и шаҳри Ваҳдат ва «Ямчун»-и ноҳияи Ишкошим ба мавсими истироҳат омода шуда, соли ҷорӣ нисбат ба ҳамин давраи соли гузашта 43 нафар зиёдтар дар ин муассисаҳо табобату истироҳат намуданд.                   Дар ноҳияи Бохтари вилояти Хатлон сохтмони Хона-интернат барои беморони касалиҳои рӯҳӣ барои 100 кат ва таҷдиди бинои нави хона-интернати пиронсолон ва маъюбони шаҳри Ваҳдат идома дорад. Илова бар ин, аз моҳи октябри соли равон боз 40 нафар эҳтиёҷмандон ба хона-интернати Ҳисор ҷойгир карда мешаванд.