СОЗИШНОМАИ ҲАМКОРӢ БА ИМЗО РАСИД

                  Душанбе, 15 октябр. (АМИТ «Ховар», Покиза Маҳмадбекова). — Зимни сафари худ ба Ҷумҳурии Мардумии Чин дар доираи иштирок дар Ҷаласаи Шӯрои Сарварони Ҳукуматҳои мамлакатҳои аъзои Созмони Ҳамкориҳои Шанхай Сарвазири Ҷумҳурии Тоҷикистон Оқил Оқилов бо Раиси Раёсати Бонки давлатии рушди Хитой Чэн Юан мулоқот кард. Тавре ба мухбири АМИТ «Ховар» аз Бонки давлатии «Амонатбонк» иттилоъ доданд, дар мулоқоти мазкур байни Бонки давлатии рушди Хитой ва Бонки давлатии амонатгузории Ҷумҳурии Тоҷикистон «Амонатбонк» Созишнома дар бораи ҳамкориҳо дар самти амалиётҳои қарзӣ бо юани хитоӣ ба имзо расид.                    Созишномаи мазкур ба рушду инкишофи ҳамаҷонибаи ҳамкориҳои иқтисодию тиҷоратии Тоҷикистону Хитой мусоидат менамояд. Истифодаи юани хитоӣ дар муомилот ба рушд ёфтани муносибатҳои тиҷоратию молиявӣ, паст рафтани нарху наво, пешгирии калавишҳои қурби асъор ва таъмини шароити мувофиқ нисбат ба пардохтҳои тиҷоратӣ мусоидат хоҳад кард.